அம்மான்: ஜோர்டானில் நடந்த ஆசிய ஹேண்ட்பால் சாம்பியன்ஷிப் (17 வயது) பைனலில் ஈரான், தென் கொரியா அணிகள் மோதின. இதில் ஈரான் 28-25 என்ற கணக்கில் வெற்றி பெற்று முதன்முறையாக கோப்பை வென்றது. கத்தார் அணி 33-26 என, பஹ்ரைனை வீழ்த்தி 3வது இடம் பிடித்தது.

பலே பல்கேரியா

பசே சிட்டி: பிலிப்பைன்சில் நடக்கும் உலக வாலிபால் சாம்பியன்ஷிப் காலிறுதியில் பல்கேரிய அணி 3-2 (21-25, 19-25, 25-17, 25-22, 15-13) என, அமெரிக்காவை வீழ்த்தியது. அரையிறுதியில் (செப். 27) செக்குடியரசு - பல்கேரியா, போலந்து - இத்தாலி அணிகள் விளையாடுகின்றன.

அரையிறுதியில் நியூசிலாந்து

செரம்பன்: மலேசியாவில் நடக்கும் பெண்களுக்கான (16 வயது) ஆசிய கோப்பை கூடைப்பந்து ('டிவிசன்-ஏ') காலிறுதியில் சீனதைபே, நியூசிலாந்து அணிகள் மோதின. இதில் நியூசிலாந்து 74-70 என வெற்றி பெற்றது. அரையிறுதியில் (செப். 27) நியூசிலாந்து, ஜப்பான் அணிகள் மோதுகின்றன.

பாவோலினி வெற்றி

பீஜிங்: சீன ஓபன் டென்னிஸ் ஒற்றையர் பிரிவு முதல் சுற்றில் இத்தாலி வீராங்கனை ஜாஸ்மின் பாவோலினி 6-1, 6-3 என லாட்வியாவின் அனஸ்டாசிஜா செவஸ்டோவாவை தோற்கடித்தார். அமெரிக்காவின் அனிசிமோவா 6-1, 6-3 என, பிரிட்டனின் கேட்டி பவுல்டரை வென்றார்.

எக்ஸ்டிராஸ்

* கான்பெராவில் நடந்த ஜூனியர் பெண்கள் ஹாக்கி முதல் போட்டியில் இந்திய அணி 2-3 என்ற கோல் கணக்கில் ஆஸ்திரேலியாவிடம் தோல்வியடைந்தது.

* சென்னையில், வரும் அக். 1-7ல் இந்திய குத்துச்சண்டை கூட்டமைப்பு (பி.எப்.ஐ.,) கோப்பை முதல் சீசன் நடக்கவுள்ளது.

* குளேபல் செஸ் லீக் 3வது சீசனில் (டிச. 13-24, மும்பை) இந்தியாவின் குகேஷ், அர்ஜுன் எரிகைசி, அலாஸ்கன் நைட்ஸ் அணிக்காக விளையாடுகின்றனர். கங்காஸ் கிராண்ட்மாஸ்டர்ஸ் அணியில் இந்தியாவின் விஸ்வநாதன் ஆனந்த் இடம் பெற்றுள்ளார்.

* ஜார்க்கண்ட் தலைநகர் ராஞ்சியில், தேசிய ஓபன் தடகள சாம்பியன்ஷிப் 64வது சீசன் இன்று துவங்குகிறது. இதில், ஒடிசா ஒட்டப்பந்தய (100, 200 மீ.,) வீரர் அனிமேஷ் பங்கேற்கவில்லை. ஆசிய விளையாட்டுக்கான (2026) 4x100 மீ., இந்திய உத்தேச அணி தேர்வு செய்யப்படும்.