மலேசியாவின் செரெம்பன் நகரில் 16 வயதுக்குட்பட்டோருக்கான பெண்கள் ஆசிய கூடைப்பந்து ('டிவிசன் பி') தொடர் நடந்தது. இந்திய அணி 'பி' பிரிவில் ஈரான், உஸ்பெகிஸ்தான், சமோவா அணிகளுடன் இடம் பெற்றது.

லீக் சுற்றில் பங்கேற்ற 3 போட்டியிலும் வெற்றி பெற்று, முதலிடம் பிடித்து அரையிறுதிக்கு முன்னேறியது. இதில் இந்தோனேஷியாவை 65-63 என வீழ்த்தியது.

நேற்று நடந்த பைனலில் வலிமையான ஈரானை மீண்டும் எதிர்கொண்டது. ஏற்கனவே லீக் சுற்றில் ஈரானை வென்றதால் இந்திய வீராங்கனைகள் நம்பிக்கையுடன் செயல்பட்டனர்.

முதல் பாதி முடிவில் இரு அணிகளும் 32-32 என சம நிலையில் இருந்தன. பின் சிறப்பாக செயல்பட்ட இந்திய அணி வீராங்கனைகள் அடுத்தது புள்ளிகள் பெற, ஒரு கட்டத்தில் இந்தியா 52-42 என முந்தியது.

பின் ஈரான் அணியினர் எழுச்சி பெற, இந்தியா 61-62 என பின் தங்கியது. கடைசி நிமிடத்தில் அடுத்தடுத்து புள்ளிகள் எடுத்த இந்தியா, 67-66 என்ற கணக்கில், ஒரு புள்ளி வித்தியாசத்தில் 'திரில்' வெற்றி பெற்று, சாம்பியன் ஆனது. ஆசிய கூடைப்பந்து 'டிவிசன் ஏ' பிரிவில் பங்கேற்க தகுதி பெற்றது.