ஐக்கிய அரபு எமிரேட்சில், ஆசிய கோப்பை ('டி-20') 17வது சீசன் நடக்கிறது. இந்தியா, இலங்கை, ஆப்கானிஸ்தான் உள்ளிட்ட 8 அணிகள், இரு பிரிவுகளாக லீக் சுற்றில் விளையாடுகின்றன. நேற்று, அபுதாபியில் நடந்த 'பி' பிரிவு லீக் போட்டியில் வங்கதேசம், ஹாங்காங் அணிகள் மோதின. 'டாஸ்' வென்ற வங்கதேச கேப்டன் லிட்டன் தாஸ், 'பீல்டிங்' தேர்வு செய்தார்.

நிஜாகத் ஆறுதல்: ஹாங்காங் அணிக்கு அன்ஷி ராத் (4) ஏமாற்றினார். பின் இணைந்த ஜீஷன் அலி, பாபர் ஹயாத் ஜோடி ஆறுதல் தந்தது. இரண்டாவது விக்கெட்டுக்கு 23 ரன் சேர்த்த போது தன்சிம் ஹசன் சாகிப் பந்தில் ஹயாத் (14) போல்டானார். 'பவர்-பிளே' ஓவரின் முடிவில் ஹாங்காங் அணி 34/2 ரன் எடுத்திருந்தது. ரிஷாத் ஹொசைன் வீசிய 9வது ஓவரில் ஒரு சிக்சர், ஒரு பவுண்டரி விளாசிய ஜீஷன் (30), தன்சிம் பந்தில் அவுட்டானார்.

ரிஷாத் பந்தை பவுண்டரிக்கு விரட்டிய கேப்டன் யாசிம் முர்டசா, தன்சிம், மஹேதி ஹசன் பந்தில் தலா ஒரு சிக்சர் அடித்தார். ஹாங்காங் அணி 15 ஓவரில் 100 ரன்னை எட்டியது. யாசிம் முர்டசா (28) 'ரன்-அவுட்' ஆனார். முஸ்தபிஜுர் பந்தை பவுண்டரிக்கு விரட்டிய நிஜாகத் கான், ரிஷாத் பந்தில் ஒரு சிக்சர் விளாசினார். பொறுப்பாக ஆடிய நிஜாகத், 42 ரன்னில் ஆட்டமிழந்தார்.ஹாங்காங் அணி 20 ஓவரில் 7 விக்கெட்டுக்கு 143 ரன் எடுத்தது.

லிட்டன் அபாரம்: எட்டக்கூடிய இலக்கை விரட்டிய வங்கதேச அணிக்கு பர்வேஸ் ஹொசைன் எமான் (19), தன்ஜித் ஹசன் (14) ஜோடி ஓரளவு கைகொடுத்தது. பின் இணைந்த கேப்டன் லிட்டன் தாஸ், தவ்ஹித் ஹிரிடோய் ஜோடி நம்பிக்கை தந்தது. ஆயுஷ் சுக்லா வீசிய 14வது ஓவரில் வரிசையாக 2 பவுண்டரி விரட்டிய லிட்டன் தாஸ், யாசிம் முர்டசா பந்தை சிக்சருக்கு அனுப்பினார். அபாரமாக ஆடிய லிட்டன் தாஸ், 33 பந்தில் அரைசதம் எட்டினார். மூன்றாவது விக்கெட்டுக்கு 95 ரன் சேர்த்த போது அதீக் இக்பால் பந்தில் லிட்டன் (59) போல்டானார்.

வங்கதேச அணி 17.4 ஓவரில் 3 விக்கெட்டுக்கு 144 ரன் எடுத்து வெற்றி பெற்றது. தவ்ஹித் (35) அவுட்டாகாமல் இருந்தார்.

இது அதிகம்

சர்வதேச 'டி-20' அரங்கில் வங்கதேசத்துக்கு எதிராக தனது அதிகபட்ச ஸ்கோரை (143/7) பதிவு செய்தது ஹாங்காங். இதற்கு முன், 114/8 ரன் (2014, சாட்டோகிராம்) எடுத்திருந்தது.