ஜெர்மனியில், 'பன்டெஸ்லிகா' கால்பந்து 63வது சீசன் நடக்கிறது. இதன் லீக் போட்டியில் பேயர்ன் முனிக் அணி 4-0 என்ற கோல் கணக்கில் வெர்டர் பிரெமன் அணியை வீழ்த்தியது. பேயர்ன் முனிக் அணிக்கு, இங்கிலாந்தின் ஹாரி கேன் 2 கோல் அடித்து கைகொடுத்தார்.

இது, பேயர்ன் முனிக் அணிக்காக ஹாரி கேன் அடித்த 100வது கோல் ஆனது. கடந்த 2023ல் பேயர்ன் முனிக் அணியில் இணைந்த இவர், 104 போட்டியில் இம்மைல்கல்லை எட்டினார். இதன்மூலம் இந்த நுாற்றாண்டில், ஒரு கிளப் அணிக்காக குறைந்த போட்டியில் 100 கோல் அடித்த வீரர்கள் வரிசையில், போர்ச்சுகலின் கிறிஸ்டியானோ ரொனால்டோ (ரியல் மாட்ரிட், 2011), நார்வேயின் எர்லிங் ஹாலந்து (மான்செஸ்டர் சிட்டி, 2024) ஆகியோரை முந்தி முதலிடம் பிடித்தார். ரொனால்டோ, ஹாலந்து தலா 105 போட்டியில் இந்த இலக்கை அடைந்தனர்.