மனிதன் புவி ஈர்ப்பு விசையை எதிர்த்து நிமிர்ந்து நிற்பதால், உள் உறுப்புகள், முதுகு மற்றும் ரத்த நாளங்களில் பல பிரச்னைகள் ஏற்படுகின்றன. கர்ப்ப காலத்தில் வழங்கப்படும் யோக பயிற்சிகள் விலங்குகளின் வாழ்க்கையை உன்னிப்பாகக் கவனித்து அதன் அடிப்படையில் வழங்கப்படுகிறது.

சதுஸ் பாத ஆசனம் சதுஸ் பாத ஆசனம், நான்கு கால் விலங்குகளை உருவகப்படுத்தும் ஆசனமாகும். இது மனித உடலில் ஈர்ப்பு விசையின் எதிர்மறை விளைவுகளை சரி செய்கிறது. மேலும் நமது காலில் நிமிர்ந்து நிற்பதன் விளைவாக ஏற்படும் லும்பாகோ, உறுப்புகளின் இறக்கம், மூலம், வெரிகோசெல் மற்றும் வெரிகோஸ் வெயின்களை சரி செய்கிறது. குறிப்பாக பெண்களுக்கு சதுஸ் பாத ஆசனம் ஒரு சிறந்த பயிற்சியாகும்.

இந்த ஆசனத்தை செய்ய, வஜ்ராசனத்தில் நிமிர்ந்து உட்கார்ந்து பின்னர் இரு உள்ளங்கைகளை உங்களுக்கு முன்னால் தரையில் வைக்கவும். குதிகால்களில் இருந்து பிட்டத்தை துாக்கி, கைகளையும், கால்களையும் நான்கு கால்கள் நிலையில் வைக்கவும். உங்கள் எடையை, உங்கள் கைகள் மற்றும் முட்டியால் சமமாக தாங்குமாறு பார்த்துக் கொள்ள வேண்டும். உடலை, தரைக்கு இணையாக வைத்து ஆழமாக சுவாசிக்கவும். சிறிது நேரம் இந்த ஆசனத்தை செய்த பிறகு, மெதுவாக வஜ்ராசனத்திற்குத் திரும்ப வேண்டும். இந்த எளிய ஆசனத்தால் ஏற்படும் நிவாரண உணர்வை அனுபவிக்கவும்.

சதுஸ் பாத கிரியா இந்த கிரியா இருக்கும் இடத்திலேயே நான்கு கால் சதுஸ் பாத ஆசனத்தில் நகர்வதன் மூலம் செய்யப்படுகிறது. சதுஸ் பாத ஆசனத்தில் மெதுவாக நான்கு கால்களிலும் முன்னே செல்லவும். பின்னர் சில அடிகள் பின்னோக்கி செல்லவும். சதுஸ் பாத க்ரியா பெண்களுக்கு குறிப்பாக கர்ப்ப காலத்தில் முதுகெலும்பை தளர்த்தி இடுப்பு சுழற்சியை மேம்படுத்த உதவும் ஒரு சிறந்த பயிற்சியாகும். வலப்புறமாக சில அடிகளை எடுத்து, பின்னர் உங்கள் இடது பக்கம் சில அடிகளை எடுக்கவும்.

உங்கள் கைகள் மற்றும் கால்களின் அனைத்து மூட்டுகளையும் பயன்படுத்தி வட்டமாக சுற்றவும். இதே போல் எதிர் திசையிலும் செய்யவும். சதுஸ்பாத க்ரியா மிதமான மூட்டுவலி உள்ளவர்களுக்கு நல்லது, ஆனால் முழங்கால்களில் காயம் ஏற்படாமல் இருக்க கவனமாகவும் மென்மையான விரிப்பில் செய்ய வேண்டும். நான்கு கால் தோரணையில் தொடர்ந்து நகர்ந்து, பின்னர் மெதுவாக வஜ்ர ஆசனத்திற்கு திரும்பி கால்களை நீட்டி ஓய்வெடுக்கவும்.

வியாக்ரஹ பிராணாயாமம் நவீன வாழ்க்கையின் சாபக்கேடான பல தசை மற்றும் எலும்பு சார்ந்த பிரச்னைகளில் இருந்து விடுபட புலி சுவாசம் மிகவும் உதவுகிறது.

பிரணவ தாரணம் மற்றும் தியானம் இது புனிதமான பிரணவ ஓம் இன் வடிவம் மற்றும் நாதம் (ஒலி) பற்றிய முழுமையான கவனம் செலுத்துவதாகும். அனைத்து உட்கார்ந்திருக்கும் நிலையிலும் இதைச் செய்யலாம். முதுகு நிமிர்ந்து இருப்பதை உறுதிப்படுத்திக் கொள்ளுங்கள். மனம் அமைதியான நிலையில் இருக்க சில சுற்றுகள் ஆழ்ந்த சுவாசத்தைச் செய்த பிறகு இதைச் செய்வது சிறந்தது.

அந்தர ஜபம் இது மனதிற்குள் ஏதேனும் பீஜ ஒலியை திரும்ப திரும்ப ஒலிப்பது. தெய்வத்தின் பெயராக இருக்கலாம் அல்லது ஓம் ஆக இருக்கலாம். சக்கரங்கள் மற்றும் அவற்றின் பீஜ மந்திரங்கள் பற்றி நன்கு அறிந்திருந்தால். சக்ர ஒலிகளையும் பயன்படுத்தலாம்.