புற்றுநோயை தடுக்கும் கொழுப்பு எது?

தற்போதைய சூழலில் கொழுப்பு சத்து என்றாலே அது உடலுக்கு தீங்கானது என்ற கருத்து உள்ளது. இது முற்றிலும் உண்மை அல்லது பொய் என்று கூற முடியாது.

எந்த வகையான கொழுப்புகள் உடலுக்கு நன்மை அல்லது தீமை செய்யும் என்பது குறித்து ஹாங்காங் பல்கலை ஆய்வாளர்கள் முக்கிய ஆய்வை மேற்கொண்டனர்.

உடலில் சாதாரண கட்டிகள் முதல் புற்று கட்டிகள் வரை அனைத்தையும் எதிர்த்து போராடுபவை ரத்த வெள்ளை அணுக்கள் தான். இவற்றில் பல்வேறு வகைகள் உள்ளன.

அவற்றுள் முக்கியமானவை டெல்டா காமா டி செல்கள். இவற்றை மட்டும் தனியாக எடுத்து ஆய்வகத்தில் வைத்து, விஞ்ஞானிகள் சோதனைக்கு உட்படுத்தினர்.

இவற்றை இரண்டு பிரிவுகளாக்கினர். ஒரு பிரிவுக்கு உணவாக கொட்டைகள், அவகாடோ, ஆலிவ் எண்ணெய் ஆகிவற்றில் இருக்கும் கொழுப்பான ஒலிக் அமிலத்தை செலுத்தினர்.

மற்றொரு பிரிவினருக்கு பால் பொருட்கள், இறைச்சி, பனை எண்ணெய் ஆகியவற்றில் இருக்கும் பால்மிடிக் அமிலத்தை செலுத்தினர்.

ஆய்வின் முடிவில், ஒலிக் அமிலம் செலுத்தப்பட்ட செல்களுக்குள் உயிரியல் இயக்கம், கட்டிகளை அழிக்கும் திறனும் சிறப்பாக இருந்தன.

பால்மிடிக் அமிலம் செலுத்தப்பட்ட செல்கள் உயிரியல் இயக்கம் பாதிக்கப்பட்டு, தங்களை தாங்களே அழித்துக் கொண்டன.

எனவே, புற்றுநோயால் பாதிக்கப்பட்டவர்கள் ஒலிக் அமிலக் கொழுப்பு நிறைந்த உணவுகள் உட்கொண்டு, பால்மிடிக் அமில உணவுகளை தவிர்க்க வேண்டும் என தெரிய வந்துள்ளது.