தமிழக கலாசாரத்தையும் பாரம்பரியத்தையும் தொன்றுதொட்டு நிலைநாட்டி வரும் பண்டிகை மட்டுமல்ல. ஆரோக்கியத்தையும், நோயில்லா சமுதாயத்தையும் வலியுறுத்தும் பண்டிகைதான் பொங்கல் திருநாள் என்றால் மிகையல்ல. மார்கழி பனி முடிந்து வெயில் ஆரம்பிக்கப்போகும் தொடக் கத்தில் தை பிறப்பதால் கோடைக்காலத்தில் தோன்றும் பல நோய்களை தவிர்ப்பதற்காகவே தை மாதத்தை பொங்கல் திருநாளாக தமிழர்கள் கொண்டாடுகிறோம். பொங்கலுக்கு சில நாட்கள் முன்பாகவே வீட்டை சுத்தம் செய்து சுண்ணாம்பு அடித்து தேவையற்ற பொருட்களை அழிக்கும் முறை போகியாக கொண்டாடப்படுகிறது. சுத்தத்தை வலியுறுத்தும் பொங்கல் பண்டிகைக்கு போகி பண்டிகைதான் முன்னோடி. சுத்தம் செய்த வீட்டின் நிலை மற்றும் கதவுகளில் மஞ்சள் பூசி குங்குமம் வைக்கின்றனர். குங்குமத்தில் எலுமிச்சைப் பழச்சாறு இருப்பதால் மஞ்சளுடன் சேரும்பொழுது கிருமி நாசினியாக செயல்பட்டு நிலை, கதவு, ஜன்னல்களில் சிறுசிறு பூச்சிகள் மற்றும் வண்டுகள் நுழையாமல் தடுக்கிறது. இவ்வாறு வருடம்தோறும் சுத்தம் செய்வதால் வீடு புத்தம் புதிதாக காணப்படுவதுடன் சுத்தமும் காக்கப்படுகிறது. குளிர் முடிந்து கோடை ஆரம்பிக்கும் தை மாதத்தில் பூமியில் ஏற்படும் அடிப்படை வெப்ப மாற்றத்தால் மனித உடலிலும் அதிகப்படியான உஷ்ணம் தோன்றுகிறது.

இதனால் நோய் எதிர்ப்பு சக்தி குறைந்து அம்மை, அக்கி, மஞ்சள்காமாலை போன்ற தொற்றுநோய்கள் ஆரம்பிக்கின்றன. இவ்வாறு தோன்றும் கிருமித்தொற்றை தடுத்து நோய் எதிர்ப்பு சக்தியை அதிகப்படுத்தவே பொங்கலன்று கரும்பை உட்கொள்கிறோம். கரும்புச்சாறு உடல்உஷ்ணத்தை தணிப்பதுடன் நோய் எதிர்ப்பு சக்தியையும் அதிகப்படுத்துகிறது. கரும்பை மென்று சாப்பிடுவதால் ஈறுகளுக்கு தேவையான சக்தி கிடைப்பதுடன் ஈறுகள் பலப்படுகின்றன.பொங்கலன்று இறைவனை வணங்க மஞ்சள் கிழங்கு பயன்படுகிறது.பூஜையில் வைக்கப்படும் மஞ்சள் கிழங்கானது நீண்டநாட்கள் பூஜை அறையிலோ, வீட்டு வாசலிலோ இருப்பதால் கிருமிநாசினியான மஞ்சளிலிருந்த கிளம்பும் நறுமணம் வீட்டில் காற்றை சுத்தம் செய்வதுடன் நுண்கிருமிகளை நுழையவிடாமல் தடுக்கிறது. போகியன்று வீட்டை சுத்தம் செய்யும்போது ஒவ்வொருவர் வீட்டிலும் தங்கியிருந்த பூச்சிகள் வெளியேறி வீட்டை சுத்தம் செய்யாத பிறர் வீட்டிலோ அல்லது ஏற்கனவே சுத்தம் செய்த வீட்டிலோ தஞ்சம் தேடி ஓடிவிடும். இதைத் தவிர்க்கவே பொங்கல் பூ என்று சொல்லப்படும் கூரைப்பூ, மாவிலை, வேப்பிலை, ஆவாரம்பூ ஆகியவற்றை ஒரே கொத்தாகக் கட்டி கூரையில் சொருகி வைப்பதுண்டு. மனிதர்கள் மட்டுமே கொண்டாடுவது பொங்கல் பண்டிகையல்ல. மனிதர்களுக்கு மாடாக உழைக்கும் ஆடு, மாடு மற்றும் விலங்குகளையும் குளிப்பாட்டிசுத்தம் செய்து மஞ்சள் கரைத்த நீரை அதன் மேல் தெளித்து கிருமிநீக்கம் செய்து மாட்டுப்பொங்கலாகவும் கொண்டாடுகிறோம். ஆகவே பொங்கல் என்பது மனிதநேயப் பொங்கலாக கொண்டாடப்படுகிறது.